७ खेलाडी मात्रै मैदानमा, २० गोल खाएपछि क्लब नै निलम्बनमा

रोम : तेस्रो डिभिजनको इटालियन लिग फुटबलमा एउटा क्लबले विपक्षीसँग २० गोल खाएपछि कारवाहीको सामना गर्नु परेको छ । तेस्रो डिभिजनको इटालियन लिग अन्तर्गत सोमबार बिहान खेलिएको खेलमा कुनेओले प्रो पिसेन्जालाई २०-० गोलले हराएको थियो ।

उक्त अस्वभाविक नतिजापछि इटालियन फुटबल संघले प्रो पिसेन्जालाई निलम्बन गर्ने निर्णय लिएको हो । ‘यो अस्वभाविक नतिजापछि हामीले लिगको नियमलाई पछ्याउँदै प्रो पिसेन्जालाई निलम्बन गर्ने लिएका छौं’, संघको अनुशासन समितिद्वारा जारी विज्ञप्तिमा भनिएको छ ।

जारी सिजनको लिगमा २५ खेल खेलिसक्दा प्रो पिसेन्जाले एउटा खेलमात्र जित्न सकेको छ । बाँकी २४ मध्ये पाँच खेल बराबरीमा टुंगिएको छ भने १९ खेलमा प्रो पिसेन्जा पराजित भएको छ । प्रो पिसेन्जा केवल आठ अंकसहित तालिकाको अन्तिम स्थानमा छ । त्यो आठ अंक पनि कारवाही स्वरुप खोसिने भएको छ ।

जारी सिजनका चार खेलमा प्रो पिसेन्जाले अत्यन्तै खराब प्रदर्शन गरेको छ । प्रो पिसेन्जाको एउटा खेललाई त रद्द नै गरिएको थियो । सोही कारणले प्रो पिसेन्जाले ३० हजार युरो जरिवाना समेत तिरिसकेको छ ।

कारवाहीमा परेपछि अब लिग तालिकामा प्रो पिसेन्जाको अंक पनि गणना गरिने छैन । सोमबार खेलिएको कुनेओविरुद्घको खेलमा प्रो पिसेन्जाले मैदानमा ओर्लन केवल आठ खेलाडीको नाम दिएको थियो । त्यसमध्ये पनि एकजना टोलीका फिजियो एलेसियो पिसियारेलीको नाम थियो ।

त्यसैले फिजियो एलेसियोले मैदानमा ओर्लने अनुमति पाएनन् । उनलाई पनि अनुशासन समितिले प्रतिबन्धको कारवाही गरेको छ । अब उनले जारी सिजनमा कुनै पनि टोलीका लागि फिजियोको भूमिका निर्वाह गर्न पाउने छैनन् ।

यसैगरी प्रो पिसेन्जा क्लबका अध्यक्ष माउरिजियो पानेल्लामाथि पनि ६ महिनाका लागि प्रतिबन्ध लगाइएको छ । उनीमाथि आर्थिक अनियमितताको आरोप समेत लगाइएको छ । क्लबका खेलाडीहरुले लामो समयदेखि आफुहरुले पारिश्रमिक नपाएको आरोप लगाएका छन् ।

पारिश्रमिक नपाएकै कारण थुप्रै खेलाडीले क्लब छाडेपछि खेलाडीको अभाव सृजना भएको हो । सुरुमा क्लबसँग ३३ जना खेलाडी भएको बताइएको छ । सुरुका केही खेलमा क्लबको प्रदर्शन पनि स्तरीय नै देखिएको थियो ।

कुनोओविरुद्घको खेलमा प्रो पिसेन्जाले मैदानमा उतारेका खेलाडी पनि सबै किशोर थिए । कप्तान निकोला सिरिग्लियानोको उमेर पनि १८ वर्षमात्र छ ।